Qostanaı qalasynyń irgesinen aǵatyn Tobyl ózeniniń bir qoınaýynan ótken jyly salynyp, paıdalanýǵa bergen Táýelsizdiktiń 25 jyldyǵy atyndaǵy demalys parkinde Ulttyq dombyra kúni merekesiniń qurmetine Oblystyq mádenıet basqarmasy uıymdastyrǵan «Dombyra-dýman» atty konsert ótti. Oǵan oblys óńirindegi dombyrashylar men dástúrli ánshiler, óner ujymdary qatysty. Keshke qaraı ótken konsertte ashyq aspan astyndaǵy amfıteatrda ıne shanshar oryn bolǵan joq. Qońyr dombyranyń shanaǵynan tógilgen kúı men kúmis kómeı ánshilerdiń áni qulaq quryshyn qandyrdy.
«Elbasynyń shildeniń 1-shi juldyzyn Ulttyq dombyra kúni merekesin etip belgilegenine rızamyn. Qansha orys mektebin bitirsek te, dombyranyń únin estigende eleńdep qalamyz, qan tartady ǵoı. Meniń nemerem «Juldyz» balalar stýdııasyna dombyra úırenýge barady. Qazir ol osy stýdııanyń balalarymen birge Parıjde baıqaýǵa qatysyp júr. Ultymyzben birge jasap kele jatqan dombyranyń qazaqqa bergeni kóp» deıdi kórermen Gúlnar Murzına.
Konsertte kórermender tek án-kúı tyńdap ǵana qoıǵan joq, dombyra týraly vıktorınalyq suraqtarǵa jaýap berip, kádesyılar aldy. Sonymen qatar merekege jınalǵandar saıabaqqa tigilgen aqboz úıdiń ishinde oblystyq tarıhı-ólketaný mýzeıi qyzmetkerleri uıymdastyrǵan dombyra kórmesin de tamashalady. Onda Muhtar Áýezovtyń, Amangeldi Imanovtyń, taǵy basqa Qostanaı óńirinen shyqqan tulǵalardyń dombyralary jurtshylyq nazaryna usynyldy.
Bir qyzyǵy, uıymdastyrýshylar konsert aıaqtalǵan soń, jınalǵandar arasynan dombyra tartyp óner kórsetýge tilek bildirgenderge múmkindik berdi. «El ishi – óner kenishi» degen, sahnaǵa dombyranyń qulaǵynda oınaıtyn ónerpazdar shyǵyp, kúı tartyp, án shyrqady.
Negizi Qostanaı qalasynda Ulttyq dombyra kúni merekesi kúndizgi saǵat 11.00-de Ortalyq ámbebap kitaphanasy aldynda «Nur Otan »partııasy oblystyq fılıalynyń «Jasa Otan» jastar qanaty uıymdastyrǵan «Dombra-party» jastar aksııasymen bastalǵan bolatyn. Tústen keıin Qazaqstan halqy oblystyq assambleıasy men Oblystyq densaýlyq saqtaý basqarmasy birlesip uıymdastyrǵan «Balalardyń kózindeı qasıetti dombyra» atty aksııa ótti. Ulttyq dombyra kúni qostanaılyqtardyń rýhyn aspandatty.
Názıra Járimbet
QOSTANAI